J. Iqbal

اسلام آباد : اقلیتی برادری نے گوجرہ فسادات کے خلاف گیارہ اگست کو ملک بھر میں یوم سیاہ منانے کا اعلان کیا ہے، جبکہ گورنر پنجاب سلمان تاثیر اور وزیراعلی شہباز شریف متاثرین کی داد رسی کے لئے آج گوجرہ کا دورہ کریں گے۔سابق وفاقی وزیر جے سالک نے گوجرہ میں پریس کانفرنس کے دوران اعلان کیا ہے کہ گیارہ اگست کو ملک بھر میں اقلیتی برادری یوم سیاہ منائے گی۔ ان کا کہنا تھا کہ ان افسوسناک واقعات میں بے گناہ افراد کی ہلاکت کے خلاف مسیحی برادری کا سوگ سات روز جاری رہے گا۔گورنر پنجاب سلمان تاثیر اور وزیراعلی شہباز شریف آج گوجرہ کا دورہ کریں گے اور متاثرین کی بحالی کے لئے اعلانات کریں گے۔ پیر کو وزیراعلی کا دورہ منسوخ ہونے پر متاثرین نے شدید احتجاج کیا تھا، جبکہ صوبائی وزیر برائے اقلیتی امور کامران مائیکل اور دیگر اقلیتی ارکان اسمبلی نے لوگوں کے سامنے اپنے استعفے بشپ آف فیصل آباد جوزف ووڈز کے حوالے کر دیئے تھے۔ پنجاب حکومت نے ٹوبہ ٹیک سنگھ کے ڈی سی او عمران سکندر اور ڈی پی او انکسار خان کو غفلت برتنے پر او ایس ڈی بنا دیا ہے جبکہ رانا احمد حسن کو نیا ڈسٹرکٹ پولیس آفیسر تعینات کر دیا گیا ہے۔